បាត់ដំបង៖ គណៈប្រតិភូខេត្តចំនួនពីរនៃព្រះរាជាណាចក្រកម្ពុជាជាប់ព្រំដែនជាមួយថៃនៅរសៀល ថ្ងៃទី២ ខែធ្នូ ឆ្នាំ២០២១ បានចូលរួមប្រជុំពិភាក្សាដើម្បីពង្រឹងកិច្ចសហប្រតិបត្តិការជាមួយខេត្តចន្ទបុរីនៃព្រះរាជាណាចក្រថៃ សម្រួលនីតិវិធីជូនដល់ដល់ពលករដែលត្រូវចូលធ្វើការនៅក្នុងខេត្តច័ន្ទបុរីនៃព្រះរាជាណាចក្រថៃក្នុងកំឡុងពេលដែលប្រទេសថៃគ្រោងនឹងធ្វើការបើកច្រកទ្វារព្រំដែនឡើងវិញ។

កិច្ចប្រជុំនេះធ្វើឡើងដោយមានការចូលរួមពីអភិបាលខេត្តបាត់ដំបងលោក សុខ លូ អភិបាលខេត្តប៉ៃលិនលោកស្រី បាន ស្រីមុំ ជាមួយលោក សុថេ ថងយ៊ាំ អភិបាលខេត្តច័ន្ទបុរីនៃព្រះរាជាណាចក្រថៃ។

ភាគីទាំងពីរឯកភាពគ្នាដោយអនុញ្ញាតឲ្យពលករខ្មែរអាចចូលទៅធ្វើការនៅឯប្រទេសថៃ គឺត្រូវអនុវត្តវិធានការសុខាភិបាល នៃប្រទេសទាំង២ និងត្រូវតែមានការចាក់វ៉ាក់សាំងកូវីដ-១៩ បានពេញលេញ (២ដូស) ត្រូវធ្វើតេស្តរកកូវីដ-១៩ និងធ្វើចត្តាឡីស័ក ហើយត្រូវបានម្ចាស់អាជីវកម្ម ឬសហគ្រាសរបស់ភាគីថៃ ទំនាក់ទំនងផ្ទាល់ និងទទួលខុសត្រូវលើពលករនោះ៕